आजदेखि धादिङका ग्रामिण सडकहरुमा यातायात सञ्चालन

धादिङ,असोज १०
यस वर्ष भाद्र महिनाको अन्तिम समय सम्म पनि मनसुन सक्रिय भएका कारण असोजको पहिलो साता सम्म पनि कच्चि तथा ग्रामिण क्षेत्रका सडकहरुमा यातायातका सवारी साधनहरु नियमित रुपमा सञ्चालन हुन सकेको थिएन । एक हप्ता अघिदेखि मनसुन रोकिएपछि सडक मर्मत गरेर यातायातका साधनहरु चल्न सक्ने भएकोले जिल्ला सदरमुकाम धादिङबेसिबाट जाने ग्रामिण सडकहरु धादिङबेसि सल्यान्टार, सिक्कटार,बुढाथुम ,आरुघाट ,खहरे , धादिङबेसि नलाङ कमलाबारी, धादिङबेसि खरीसम्म आजदेखि बस सञ्चालन गरिएको नेपाल यातायात व्यावसायि संघ धादिङका महासचिव राजेश प्रजापतिले जानकारी दिनुभयो । आजदेखि बस सञ्चालनमा आपछि सम्बन्धित क्षेत्रका सर्वसाधारणहरुलाइ सदरमुकाम लगायतका विभिन्न स्थानहरुमा आवत जावतको लागि सहज भएको छ । जिल्लाको अन्य सडक खण्डहरु धादिङबेसि धुवाकोट, कटुञ्जे सेम्जोङ, लपाङफेदि ,गुम्दी, दार्खा,लागायतका सडकहरुमा भने सडक मर्मत हुन बाँकि रहेको र स्थानिय निकायका प्रमुख तथा प्रतिनिधिहरुले यातायात सञ्चालनको लागि जानकारी नगराएका कारण सञ्चालन हुन नसकेको प्रजापतिले जानकारी दिनुभयो । धादिङबेसि सुनौलाबजार सडक खण्डमा भने यस अघिदेखिनै यातायात सञ्चालनमा रहेको छ । यस वर्ष वर्षा धेरै भएका कारण ग्रामिण क्षेत्रका अधिकांश सडकहरु धेरै बिग्रिएको छ । त्यस कारण मर्मतको लागि धेरै समय लाग्ने देखिन्छ, भने अर्काेतिर यात्रुहरुले पनि हैरानि बेहोर्नु पर्ने बाध्यता रहेको छ । दशैं र तिहारका लागि विदेश तथा स्वदेशमा रहेका मानिसहरु अब विस्तारै घर फर्कने क्रम सुरु हुने हुँदा पनि अव यातायातका साधनहरुमा यात्रुको चाप बढ्ने देखिन्छ । साथै समयमा नै यातायात सञ्चालन नभएमा चाड पर्वको लागि आवश्यक खाद्य्यान्न लागायतका सामाग्रीहरु ढुवानीको लागि पनि समस्या हुने देखिन्छ ।